Home / Opini / Nene Tofilus ju kapingin pi Maladewa

Nene Tofilus ju kapingin pi Maladewa

Bagikan Halaman ini

Share Button

14                                                                                        ilustrasi

 

KUPANG, MORAL-POLITIK.COM – Ini siang talalu panas. Nene Tofilus su sonde tahan deng itu karingat yang malele sonde barenti-barenti. Dia pung handuk kecil sampe basa ke baru abis rendam di dalam bokor sa.

Daripada sonde lama lai dia pung napas bisa barenti, dia ikat bae-bae dia pung kaen lalu ame plastic tempat simpan siri, pinang, kapur deng tembako ko pi bacarita deng Ibu Ketua RT sa.

Jaraknya sonde jao, hanya sembilan pulu meter. Dia tarek-tarek dia pung kaki yang ada asam karna asam urat ada nae tinggi, tadi pagi Ba’i Tofilus pi pasar bukan beli sayur puti ma beli bayam. Alasannya untuk tamba tenaga tapi malah bawa bencana untuk Nene Tofilus. Akhirnya Ba’i Tofilus pung rencana batal su ma…

Sampe di Ibu Ketua RT pung ruma sonde ada satu orang ju. Tapi dia pung telinga tangkap ada suara orang bakatawa dari ruma Opa Son yang terkenal tukang bacarita putar balek. Dia pun jalan pi sana, dia yakin Ibu Ketua RT ju ada di sana.

Nene Tofilus togor ame deng lima pasang suami-isteri tapi dong son toe. Semua ada pasang telinga ko dengar ame cerita dari Ba’i Son.

“Kalo beta kaya raya dan punya pesawat pribadi, beta ju pasti ajak bosong semua tapaleuk di Maladewa,” kata Opa Son serius mati pung.

Seorang Nene bernama Mia katawa pe’e gargantang lalu bilang, “Lu ajak kotong ko ajak deng bini muda. Jang putar balek di siang bolong begini do tek.”

Nene Tofilus pung testa langsung bakerut memang, dia penasaran Maladewa itu jao sampe dimana ko musti pi pake pesawat pribadi, bukan pake ojek atau bemo sa ko bayar mura.

Baca Juga :  "Manisnya" berkaraoke plus-plus di Jakarta Barat

“Woeeee, Maladewa tu dimana?” tanya Nene Tofilus kepada Ba’i Son.

Semua mata liat ame deng Nene Tofilus, lalu secara bersama-sama balek pi Ba’i Son pung mata. Tapi Ba’i Son ada sibuk kas kaluar dia pung tambako sepa dan kertas dolar dari dalam dia pung saku baju, lalu dia gulung, bakar ko isap itu rokok.

Seorang Nene bernama Tabita sonde bisa tahan dia pung penasaran.

“Itu Maladewa di mana?” tanya dia pi Ba’i Son.

Sambil garu-gari kapala Ba’i Son bilang dia ju sonde tau, dia hanya tau itu tempat karna nonton di TV.

“Ooooo, yang ARB deng dua orang artis cantik pi sana deng pesawat pribadi tu ko?” kata Ibu Ketua RT.

Nene Tofilus tamba heran lai. Dia sonde tau ARB itu sapa, apalai itu dua artis cantik dong itu. Dia baru mau tanya tapi tiba-tiba dia pung cucu datang panggel bilang Opa Tofilus ada mabok laru di tempat pesta, sekarang ada munta-munta di rumah.

Sonde pake batogor lai Nene Tofilus jalan cepat-cepat, tapi dia pung pikiran bilang satu saat musti ajak deng Ba’i Tofilus ko tapaleuk pi Maladewa.

 

Penulis : Vincent

Komentar Anda?

Tags :

Bagikan Halaman ini

Share Button