Home / Opini / Kapingin Walkot Parampuan…

Kapingin Walkot Parampuan…

Bagikan Halaman ini

Share Button
neIlustrasi Nene Meliana.

 

 

 

MORAL-POLITIK.COM – Di teras rumah Nene Meliana su rame dari jam lima pagi. Ayam baru kokoreo pendek-pendek tapi Nene Meliana deng Nene Lia dan Nene Linda su bagosip politik.

“Kotong parampuan NTT ni hebat-hebat. Bayangkan sa, Ketua Sinode GMIT tu Pdt. DR. Mery Kolimon, Ketua KPU NTT tu Tanti Adoe, lalu ada Sara Lery Mboeik yang bos PIAR,” kata Nene Meliana sambil bikin bae dia pung kaca mata pung letak.

Nene Lia senyum-senyum, son lama setela Nene Meliana omong abis langsung dia potong. “Belom bisa bilang hebat. Soalnya belom perna ada Wali Kota Kupang parampuan. Calon na su ada tapi kala, ko abis mana kotong parampuan mau pili pemimpin parampuan?”

Nene Meliana son bisa tangkis ame dia pung kitel. “Memang kotong parampuan ni ke apa ko. Ada calon parampuan kotong son toe, kotong hanya mau toe deng calon laki-laki, apalai kalo dia tinggi besar, kotong pung mata biji dong mau tapalocok sa,” katanya sambil ame sirih pinang ko maale.

Nene Melinda pung gargantang su bagatal mati pung, son sabar lai untuk baomong. “Coba kalo parampuan jadi Walkot, mungkin sa ini kota barisi dan manis ke itu Ibu Walkot pung muka. Laki-laki dong mana tau urus dong pung diri, apalai mau urus kasi cantik ini kota?” kata dia menggerutu.

Nene Meliana pikir-pikir sampe dia pung dahi mangkarut lalu dia bilang, “Coba kalo itu Sara Lery Mboeik berani maju Calon Walkot sa bae. Pasti dia sikat abis itu orang pamalas deng yang suka ba KKN dong!”

Baca Juga :  Opini: Mahasiswa UMJ prihatinkan kerusakan terumbu karang Raja Ampat

Nene Lia bangun dari karosi. Sambil pegang ame dia pung pinggang dia bilang, “jang sampe hanya panas-panas ta’i ayam sa. Kotong su pili abis dan dilantik, abis itu dia su lupa ame. Ko kuasa tu enak naaaaaaa.

Nene Meliana ju bangun badiri. “Ko kuasa tu enak na, jadi orang dong hanya panas-panas ta’i ayam sa.”

Dengar kata panas-panas ta’i ayam, dong tiga tamba katawa pe’e ame itu gargantang sampe Ba’i Zarus bangun dari tidor. Sambil pegang ame dia pung pinggang, dia jalan roso-roso kaki ko menghadap deng Nene Meliana. “Lu pi masa kopi kasi beta do, datang baru bosong basambung lai.”

Nene Meliana son mau terima bae Ba’i Zarus parenta dia di muka dia pung kawan. “Ko lu son ada kaki tangan lai ko? Kalo beta mati duluan lu su son minum kopi lai?”

Ba’i Zarus son mau batengkar di muka orang lain. Sambil makan dia pung gigi dia roso-roso ame dia pung kaki pi dapur. Tapi dalam hati bilang “Tar tau kanapa ko beta ame dia jadi beta pung bini. Yang sonde manis tapi mau melayani deng bae na beta son mau. In dia ko kena upa dosa ko sonde…

Penulis : Vincent

Komentar Anda?

Bagikan Halaman ini

Share Button