Home / Opini / Nene Meliana Mangidam Rujak, Suru Ba’i Zarus Cari Papaya Modok

Nene Meliana Mangidam Rujak, Suru Ba’i Zarus Cari Papaya Modok

Bagikan Halaman ini

Share Button
Emma Morano - AShim BlogIlustrasi Nene Meliana.

 

 

MORAL-POLITIK.COM – Ini pagi angin son sama ke kemarin. Dia batiup pelan-pelan sa. Daon-daon pohon dong ke ada dudu mangantok. Nene Meliana dudu sendiri di dia pung teras ruma. Ba’i Zarus masi tidor ngorok sama ke ada sensor pohon kadondong kaboak.

Tiba-tiba sa Nene mangidam makan rujak. Mau pi beli papaya, lemon deng dia pung bumbu dong tapi Nene pung doi su tipis mati pung. Tarpaksa dia maloi-maloi pi tetangga dong pung halaman ruma. Ma india son ada yang papayanya su modok, semua masi manta, mangkali dua minggu lai baru modok. Kalo su bagini Nene pung pikiran hanya pi Ba’i Zarus. Ko dia pung laki satu sa naaaaaa.

Dia tarek ame dia pung kaen pi atas ko bisa jalan cepat-cepat pi kasi bangun Ba’i Zarus.

“Cinta eeeee, lu bangun su,” kata Nene Meliana sambil goyang-goyang Ba’i Zarus pung pipi yang su mulai noe.

Ba’i Zarus langsung tabangun tapi belom buka ame dia pung mata lebar-lebar.

“Cinta eeeee, kenapa ko ini pagi be liat lu ke tamba ganteng sa eeee,” tamba Nene Meliana.

Ba’i Zarus tamba batingka lai. Dia pura-pura ngorok besar-besar.

Nene Meliana sonde mau putus asa. Dia coba pake akal tipu-tipu ke orang politik dong.

“Lu mau bangun ko beta ame aer es ko siram ame deng lu,” ancam Nene Meliana.

Daripada kena siram deng aer es, Ba’i Zarus kucak-kucak dia pung mata lalu bangun pelan-pelan supaya dia pung pinggang tua tu son tasala.

“Mau suru apa na suru su ko jang pake politik Rote,” kata Ba’i Zarus.

Baca Juga :  Afsel: Skandal diplomatik Pesta Perkawinan Mewah, Keluarga Gupta Minta Maaf

“Ado cinta eeee, beta ada kapingin makan rujak ni, cinta pi cari bua papaya mas modok di tatangga dong ko beta bikin dia pung bumbu, abis itu kotong dua dudu bagosip di teras,” kata Nene Meliana sambil elus-elus Ba’i Zarus pung bahu.

“Lu mangidam begini ni karna su tarlambat berapa bulan? Masa su umur tuju pulu ma masi bisa bunting?” kata Ba’i Zarus setela turun dari tempat tidor.

Nene Meliana tamba manja. “Son bunting cinta eeee, hanya kapingin makan rujak sa. Pi cari papaya su, pulang datang na beta carita satu barang yang heboh pung,” rayu Nene Meliana.

“Kalo gosip orang salingku beta pamalas dengar. Gosip demokrasi sa,” tawar Ba’i Zarus.

“Ho na lu pi cari papaya su, pulang datang baru beta mainkan itu gosip,” bisik Nene Meliana di Ba’i Zarus pung talinga ana.

Demi gosip, Ba’i Zarus jalan cepat-cepat pi Ba’i Theo pung ruma. Kemarin dulu dia ada liat papaya modok di sana. Cuma sayangnya Ba’i Theo masi tidor ngorok, jadi dia ketok pintu lalu eki Ba’i Theo pung nama sampe dia pung gargantang mau putus tapi son bangun-bangun ju. Karna son sabar mau dengar gosip, dia ame batu ko lempar Ba’i Theo pung atap seng.

“Sapa yang lempar ruma tu? Beta dapa bosong beta falungku bosong pung kandok sampe pica!” teriak Ba’i Theo kuat-kuat.

“Beta oooooo, Ba’i Zarus,” kata dia supaya Ba’i Theo cepat kaluar ruma.

Betul ju. Ba’i Theo keluar sambil pegang dia pung parang tajam. Ba’i Zarus ketawa waktu liat itu parang. “Lu mau potong beta ko? Lu potong ju son masok. Lu masi ingat Nimbrot Titi Baki ko sonde?” kata Ba’i Zarus.

Baca Juga :  AHY-Prabowo, lumbung suara Jokowi akan tergerus?

Ba’i Theo ketawa lalu bilang, “Yang oto giling son mati tu, tapi takut mati pung deng dia pung bini to?”

Supaya son bapanjang kata Ba’i Zarus angguk-angguk dia pung kepala, lalu langsung tembak minta papaya modok. Ba’i Theo suru Ba’i Zarus pi ketu sendiri berapa sa yang dia mau. Ba’i ame tiga bua biar ko Nene Meliana makan rujak sampe mancret ko jang baomong banyak lai.

Pulang sampe di rumah Nene Meliana su siap bumbu deng piso tajam. Dia langsung kupas dan potong papaya kecil-kecil ko campur deng bumbu. Begitu mulai makan Ba’i Zarus tagi gosip.

“Pada suatu hari…,” kata Nene Meliana.

Ba’i Zarus ketawa karena dia pikir Nene mau cerita dongeng untuk bujuk ama dia pung cucu tidor ngorok.

“Di suatu hutan rimbun, tinggalah seorang Nene tua yang cantik sekali. Lalu datangla seorang pangeran muda yang ganteng tapi tinggi lonjong,” lanjut Nene Meliana.

“Lalu, itu pangeran ser itu Nene tua dan dong pacaran dan kawin tooooo,” potong Ba’i Zarus.

Nene Meliana ketawa lalu bilang, “Sonde oooo be kira. Nene son mau karna dia pikir itu pangeran ada mau Nene pung harta karun sa.

Ba’i Zarus ketawa lalu bilang kasihan itu pangeran pung nasib. Su ser nene tua lai cintanya ditolak meta-menta.

Nene Meliana ketawa karna su berhasil putar balek deng dia pung laki. Tapi dia tamba kalimat penutup.

“Kan kotong sama-sama tau to, tak selamanya cinta itu harus memiliki, cukup barmaen perasaan dari jao-jao sa,” desah Nene Meliana sambil katawa lebar-lebar. **

Penulis : Vincent (Novelis)

 

Komentar Anda?

Bagikan Halaman ini

Share Button